بیر واخت سنینله من باخ بو مکاندا
ابدی آیریلیب ، وداعلاشمیشیق ،
ایندی او زاماندان چوخ ایللر کئچیر ،
دره لر کئچمیشیق ، داغلار آشمیشیق ،
آیریلدیق دئییرم ، نه دئییم گولوم ،
بوتون فیکیرلریم سنینله قالدی ،
آیریلدیق آرانی آلدی دومان ، چن ،
کیملر روحوموزو آیرا بیلدی ،
زامان کؤهلنینی چاپدی دؤرد نالا ،
آیلاری ، ایللری توتا بیلمدیم ،
زامانسیز ، مکانسیز بیر دونیا گزدیم ،
نئیله ییم آرزوما چاتا بیلمدیم ،
آرزو:
اینسانلاری یاشادان بیر حیسس ،
اینسانی یاشادان ، اؤلدورنده او ،
آرزو :
بو گوندن صاباحا الین آچان یول ،
گؤزلری آغلادان ، گولدورنده او ،
من قالدیم ، بو یئرده ابدی قالدیم ،
سنی آلین یازین سالدی دیدرگین ،
سن گئتدین ، من قالدیم بیر ده اویئرلر ،
آیریلیق مکانین گؤرورم هر گون ،
سن باخان پنجره کور اولوب ایندی ،
سن دوران قاپیدا غم دایانیب دی ،
تینده کی ، چئشمه نین قورویوب سویو ،
کوچه ده کیم قالیب ، کیم دایانیبدی ،
کوچه دن داغیلیب یاشیدلاریمیز ،
کوچه میز نه یامان قوجالیب بو گون ،
او قیزلار ، اوغلانلار هره بیر یئره ،
دؤورانین الیله گئتدی دیدرگین ،
من قالدیم بیر دونیا آجی خاطیره ،
منیمله قوجالمیش بیر کوچه قالدی ،
گونلر اؤتوشدوکجه آغاردی ساچیم ،
قوجالدی منیمله هر شئی قوجالدی ،
سنین گنجلییین ذئهنیمده هر گون ،
گؤردوگوم آنلار تک گنج یاشاییردی ،
منیم خیالیمدا سن همان کی قیز ،
همان رنگ رخسار دینج یاشاییردی ،
بیر وئدیو کاسئتده سنی گؤرنده ،
تانییا بیلمدیم منی باغیشلا ،
باغیشلا دئییرم ، ذئهنیمی زامان ،
کورلادی میلیونلار نقش و ناخیشلا ،
گؤردوم کئچیردیگین عذابی ، دردی ،
اوزونه ایز سالان قیریشلاریندا ،
طالعین آجی سی اظطرابلاری ،
اوخونور بیر به بیر باخیشلاریندا ،
یامان قوجالیبسان آ کؤورک مارال ،
سنه ده منه ده یازیقلار اولدو ،
ایللر ایز قویدوغو اوزونو گؤردوم ،
خیالیم قوردوغو دونیا پوزولدو ،
سخاوت عزتی – عندلیب
بیلن اولماییب هله
بوقاپیدان گئدن چوخ ،
گلن اولماییب هله ،
گئدنلر آغلار گئدیر،
گولن اولماییب هله ،
تاپیلان یوخ ایتن چوخ ،
قورتاران یوخ باتان چوخ ،
بو بازاردا ساتان چوخ ،
آلان اولماییب هله ،
سحرین یئلی اسیر ،
گون گئتمگه تلسیر ،
بو دونیا بیر باغلی سیر ،
بیلن اولماییب هله ،
گئچدیم غملر آداسین ،
گؤردوم شنلگین یاسین ،
توزلو کؤنلومون پاسین ،
سیلن اولماییب هله ،
آشیق چالیر جنگینی ،
کرمی ، شئشنگینی ،
کؤنلومون آهنگینی ،
چالان اولماییب هله ،
تیر تیکان باسیب چؤلو،
ایتیب حیاتین یولو ،
دیریدن چوخدور اؤلو ،
اولن اولماییب هله ،
سخاوت عزتی –
عندلیب
سخاوت عزتی
اوچورتدوم اوغلومون قوردوغو ائوی
کدرلنیب یامان ناراحات اولدو
بس نییه اوچورتدون دئییب آغلادی
كدره لی یاشیلا گوزلری دولدو
یئنی دن قوراراق دئدیم آی بالا
گور نه چتین ایشدی بیر ائوی ییخماق
ائوجیك اوچوشونا دوزه بیلمیرسن
حیات اوچوشونا كیم دوزر آنجاق
سعادت سارایی دیله هر كسه
سنین ده خوش گونون بو قورومدادی
تالانتی سئونین كونلو تالاندی
كیم دئییر سعادت اوچورومدادی
یاز گلیر داغ دره بزه نیر گوله
آلچاغا –
اوجایا بیر گلیر خزان
اینسانلار گولرسه سنده گولرسن
آغلاسا بونو بیل آغلیاجاقسان
نه دئییم
اسیب کؤنوللره آجی یئل کیمی
محببتی دوندورانا نه دئییم
ایستی ندیر ، سویوق نه دیر آنماییب
کؤنلوموزو سیندیرانا نه دئییم
عؤمور گئدیر آددیم ، آددیم گون ایله
دیل یاراسی درمان اولماز مین ایله
نیفرت ایله ، غضب ایله ، کین ایله ،
عشق اوجاغین سؤندوره نه نه دئییم
شیرین –
شیرین سئودالاری قاندیریب ،
گوله –
گوله محببتی آندیریب ،
عشق اودویلا عندلیبی یاندیریب ،
سرین –
سرین گئن دورانا نه دئییم ،
سیل گؤروم ،
گؤزدن آخان یاشی سیلمک آساندی ،
اورکلردن آخان یاشی سیل گؤروم ،
گل ها گلده هامی گلر عزیزیم ،
هونرین وار گئدها گئتدده گل گؤروم ،
سئوگی باغچلسینا گیرمک ایسته سن ،
گؤزللیکدن سرگی سرمک ایسته سن ،
بو دونیانی گؤزل گؤرمک ایسته سن ،
ازل باشدان اؤزون گؤزل اول گؤروم ،
قویما دوشمن وطن اوسته ال آچسین ،
ائله دانیش آنا دیلیم دیل آچسین ،
آرزولارین چیچک آچسین ، گول آچسین ،
« لاله گؤروم ، سونبول گؤروم ،گول گؤروم »
قوی قیزیشیم اوجاغیندا ای وطن ،
یئر ویر منه بوجاغیندا آی وطن ،
داغلارینین قوجاغیندا ای وطن ،
اوبا گؤروم ، اویماق گؤروم ، ائل گؤروم ،
یئر سیز یئره اؤز –
اؤزونو اؤین دوست ،
من –
من دئییب سینه –
سینه دؤین دوست ،
عندلیبه عئیبلی سن دئین دوست ،
دوز اوغلانسان اؤز عئیبینی بیل گؤروم ،
دونیا
یئمیشم یئتیشیم سونرا در منی ،
آماندی درمه سن کال منی دونیا ،
نه اعتبار سنین بیرجه آنینا ،
فیرصت وئر قورتاریم کلمه نی دونیا ،
چیغیران هارایام ، هایام ، فریادام ،
دوندوران داغ بوزو ، یاندیران اودام ،
سنینله اؤزگییم ، سنینله یادام ،
سیلسن دفتریندن سیل منی دونیا ،
عندلیب اللی ایدیم یوزه چاتمادیم ،
دره دن ، تپه دن ، دوزه چاتمادیم ،
قویدوغون ایرده ، ایزه چاتمادیم ،
یوردو چاشباش ووران یول منی دونیا
1376/102
اولماسن
بو بئش گونلوک عؤمورونو ، گونونو ،
بوش ، بوشونا سورنلردن اولماسن ،
اؤز یئرینده گؤر آلچاغی ، اوجانی ،
داغی تپه گؤرنلردن اولماسن ،
اوزاق دولان هر آغریدان ، آجی دان ،
قوی اوزونه آچیلماسین آجی دان ،
« فضولی » نین اورگینی آجیدان ،
یامان خبر وئرنلردن اولماسن ،
من دئمیرم هر ذلته بویون ای ،
دوز عمله ، دوز نییته بویون ای ،
حقیقته ، حقیقته بویون ای ،
هر قاپییا گیرنلردن اولماسن ،
دونیامیزدا باهارا دؤن ، یازا دؤن ،
حققه کئدن جیغیرا دؤن ، ایزه دؤن ،
آی عندلیب اورک آچان سؤزه دؤن ،
غم چیچگی درنلردن اولماسن ،
آغلادیم
آغلامازدیم بونو بیلین آدوستلار ،
یاخشی پیسه دؤیولنده آغلادیم ،
نور ظولمته ، دوز اییرییه ، گؤز قاشا ،
مرد نامرده اییلنده آغلادیم ،
سور عؤمرونو وطن اوچون ، ائل اوچون ،
دؤن یاغیشا چمن اوچون ، گول اوچون ،
مقام اوچون ، منصب اوچون ، پول اوچون ،
اؤیولمزلر اؤیولنده آغلادیم ،
آی عندلیب درد اورگی تیکه لر ،
یارا وار کی درمان اولماز تیکه لر ،
ائل مالیندان تیکه لنن ، تیکه لر ،
دادلی –
دادلی یئیلنده آغلادیم ،
جیغالی تجنیس
کامیل باغبان سو وئرمسه باغینا ،
آلماسی سارالیب آی انار یانار ،
آشیق اویانار –
یانار
درده اویانار –
یانار
اووو كئچن اووچولار
بیر واخت اویانار یانار
عشقین چؤللرینده یانان عاشیقام
هانی منیم کیمی اویانار یانار
اینسان اولان قانا ویجدان ، قانا دین ،
ظالیم اووچو وورما طرلان قانادین ،
آشیق دئیر قانادین
دوستوم دوستون قان آدین ،
آمان ائللر دئمه دیم ،
باغریم باشین قانادی ،
یانیر قلبیم ائشیدنده قان آدین ،
داغلاردا بو آدا اوی یانار یانار ،
چوخلاری دونیادان گور اوغلو گئتدی
مزار اوغلو گئتدی ، گور اوغلو گئتدی ،
عزیم کور اوغلو گئتدی
بوردان کار اوغلو کئتدی
عؤمور ندی بیلمدی
کورون کور اوغلو گئتدی
بو یئردن ستارخان ، کوراوغلو گئتدی
عندلیب اونلاری هئی آنار یانار ،
كندیمیزده بیر یول واریدی
بیر واختلار بو كنده بیر یول باخاردی ،
ایندی گؤزلرینی تیر – تیكان توتوب ،
گلنی ، گئدنی اولمادیغیندان ،
دونیانین خئیرینی – شررینی آتیب ،
زووارسیز بیر مزار یولونا بنزر ،
بو یئرده دئ نلر یادیما دوشور ،
بیر واخت او یوللاردا كندین قیزلاری ،
اؤتدوگو نغمه لر یادیما دوشور:
« بولاق اوسته دوران گؤزل
قولتوغوندا قورآن گؤزل
قورآن سنه غنیم اولسون
عهدینی سیندیران گؤزل »
كیمی سئوداسیندان آچاردی صؤحبت ،
كیمی سئوگیسینه قوشما قوشاردی ،
بلكه او قیزلارین توركولریله ،
او یول گوندن – گونه گؤزللشردی ،
كروان قاطار – قاطار آخیب گئدردی ،
دوشردی داغلارا زینقروو سسی ،
كؤهنه كیتابلارین ناغلینا بنزر ،
كروانین بو یئردن گلیب ، گئتمه سی ،
« آغ دوه دوزده قالدی
یوكو تبریزده قالدی
اوغلانی اؤلدوردولر
درمانی قیزدا قالدی »
كروان ائلچیسی ایدی ، خبرچی سی ایدی ،
ائلیندن یوردوندان گئن دوشنلرین ،
خوجالار خوجاسی ، خوجا عزیزلر ،
دویاردی خالقینین خئیرین – شرین ،
غریبه غوربت ده ، بامسییا داردا ،
چاتدیران خبری خوجالار هانی ،
ایللردی دونیامیز خوجاسیز قالیب ،
بیلن خئیری – شری خوجالار هانی ،
گولدوك زامان كئچدی ، دؤوران دییشدی ،
یوللار یاخینلاشدی ، یوللار آزالدی ،
كروان خبرینه گرك قالمادی ،
پست ، تیلفون اونلارین یئرینی آلدی ،
نه قدر قیسالدی ، آزالدی یوللار ،
اینسانلار او قدر اوزاقلاشدیلار ،
محبت ، صداقت اینسانلیق اؤزو ،
بو كسه یوللاردان چیخیب قاچدیلار ،
كند دوشدو فرح دن ، ائل كؤچدو بیر – بیر ،
بولاخدا قورودو چایدا قورودو ،
اوستونو اوت باسان او یول – یولاخدان ،
نغمه لر كسیلدی هایدا قورودو ،
نئچه اولدو بدؤولر ، قیرقی تك آتلار ،
آتلار اونودولدو یول – یولاق ایتدی ،
اؤزوندن نؤكره – نؤكر كسیلدی ،
شهرلر قوینوندا بئچارا كتدی ،
گل آپار منی
بیر گون منه بئله بیر مئساج گلدی :
« بیر گون گلجییم سوراخینا الیندن توتوب سنی آپاراجییام بیر یئره كی هئچ كسین الی بیزه چاتماسین »
امضاء :سنه قوربان عزرایل
یالانلار بؤهتانلار دونیاسیندییام ،
گل بئله دونیادان ، گل آپار منی ،
بیر اؤزگه دونیانین سئوداسیندییام ،
بو قال و غوغادان گل آپار منی ،
گل بئله دونیادان ، گل آپار منی ،
سئومك یالان اولوب ، سئوگی اویونجاق ،
« شنلیك ذرره – ذرره غم قوجاق – قوجاق »
گل وئرك ال – اله قوشولاق ، قاچاق ،
بو غملی غولیادان گل آپار منی ،
گل بئله دونیادان ، گل آپار منی ،
قیزیلی – گوموشو داش – قاشی یالان ،
گولوب اویناماغی ، گؤز یاشی یالان ،
دوستو محببتی ، یولداشی یالان ،
یالان تمنادان گل آپار منی ،
گل بئله دونیادان ، گل آپار منی ،
محببتی یالان ، عشقی كین دی بو ،
قیبله سی بیلینمز ، ایمان ، دین دی بو ،
بهره سی هئچ اولان بیر اكیندی بو ،
سونسوز ماجرادان گل آپار منی ،
گل بئله دونیادان ، گل آپار منی ،
گل كی ، گلیشینی گؤزلئییر گؤزوم ،
سنی گؤزلمكدی گئجه گوندوزوم ،
یامان یاد اولموشام اؤزومه – اؤزوم ،
قورتار بو جزادان گل آپار منی ،
گل بئله دونیادان ، گل آپار منی ،
میزه باخ میزه
دَییشدی معناسین عشق و محببت ،
دوشدو اعتباردان سؤزه باخ ، سؤزه ،
یالانی باشاران باشا چكیلدی ،
قالدی آیاقلاردا دوزه باخ ، دوزه ،
كیمی خیانته صداقت دئدی ،
كیمیسی نیفرته محببت دئدی ،
كیمی سئوینج آلدی ، كیمی غم یئدی ،
زامانین چالدیغی سازا باخ ، سازا ،
یاخشی یامان بیر – بیریله دئییشیر ،
عؤمور گئدیر اینسانیلا دؤیوشور ،
آی عندلب مقاملاردا دَییشیر ،
الدن اله كئچن میزه باخ ، میزه ،
يازار : سخاوت عزتي
