زليمخان يعقوب
زليمخان و سخاوت عزتي
زلیمخان یعقوب
زلیمخان یعقوب2/1/1950اینجی ایلده گورجستان جمهورییتینین بولنیسی ائلینین« كپنكچی» كندینده آیدین بیر عایله ده دونیایا گلدی . آتاسی فن معلیمی اولسادا ادبیاتا اوستونلوك وئریردی .آناسی گوللو خانیم تورك فولكولورونون یاخشی بیله نی ایدی .اؤزللیكله بایاتیلار ، ناغیللار،داستانلار ساحه سینده تانینمیش بیلنلردنیدی .آیریجا آناطرفینده ده یرلی شاعیرلر واریدی . بویوك دده سی« آلخاص آغا حاج عالی اوغلو(1)» نو تانیمایان یوخیدی .1967 اینجی ایلده دوغما كندینده اورتا مكتبی قورتایب آذربایجان دؤولت بیلی یوردونون كیتابخانه چیلیك فاكولته سینی بیتیردی . ادبی یارادیجیلیغا 15 یاشینداایكن « مئشه بی » آدلی لیریك شعرله باشلادی . ایلك شعری بولنیسی نین « غلبه بایراغی » غزئته سینده یاینلاندی . 1968 ایجی ایلینده باكی یا یئرلشدی ادبی ، اجتماعی فعالییتینی باكی نین ایستی قوجاغیندا آذر كیتاب تشكیلاتیندا ساتیجی ، باش ساتیجی ، شعبه مودورو ، كؤنوللو كیتاب سئورلر جمیعتینده مركزی یایین مودورو یازیچی نشرییاتیندا ادبی شعبه مودورو كیمی وظیفه لرینده باشلادی 1995و2000 ایجی ایللر ایكی كره اولاراق آذربایجان میللی مجلیسینه باكی دان میللت وكیلی سئچیلدی
(1)شاعیرین شعرلریندن « عاشیقلاردان ایشقلار » توپلوسوندا وئرمیشیك سخاوت عزتی.
شاعیرین چاپ اولموش اثرلری :
1ــ كؤنلومون سسی گنجیلیك 1980 باكی
2ــ یولوم ائلدن باشلانیب یازیچی 1981 باكی
3ــ اود آلدیغیم اوجاغلار یازیچی 1989 باكی
4 ــ بیز بیر عشقین بوتاسییق یازیچی 1989 باكی
6 ــ زیارتین قبول اولسون گنجلیك 1991 باكی
7 ــ شاعیر طالعی (فرانسیزجا ) گنجیلیك 1991 باكی
7 ــ شاعیر هارایی گنجیلیك 1995 باكی
9 ــ بیر الی تورپاقدا بیر الی حاقدا آذربایجان 1997 باكی
9 ــ بویاشیل آغاجین آلتی بیزیمدی آذربایجان2000 باكی
10 ــ سؤز جامی ( گورجو دیلینده ) آذربایجان2000 باكی
10 ــ زلیمخان یعقوب ( فوتو آلبومو ) آذربایجان2001باكی
12ــ سنی سئومك اوچون گلدیم دونیایا اوجاق 2003 استانبول
13 ــ زلیمخان یعقوب یاشایشی و بیرنئچه شعرلری بیلفئلد آلمان
14 ــ زلیمخان یعقوب . نیظام الدین اونك آنكارا 2003
15 ــ من سنین قلبینه نئجه یول تاپیم آذربایجان 2004 باكی
16 ¬¬– قایداق اوول کی خاطیره لره گنجلیک 2005 باکی
17 – گؤزلریمین نورو دوغولدوغوم بوتورپاق پئداگوژییا 2005 باکی
18 – من بیر داغ چاییام پئداگوژییا 2006 باکی
عدالتی دینله دیم
کیم کئچردی او کئچدییی یوللاری ،
کیم آشاردی او آشدیغی یاللاری ،
کیم ووراردی او ووردوغو خللاری ،
افسانه نی ، حقیقتی دینله دیم ،
بیر مجلیسده عدالتی دینله دیم ،
بارماغیندا اود اولموشدو تزَنه ،
بیز یانیریق اوجاغا نه ، کؤزه نه ،
داش دئیردیم آلیشماییب دؤزنه ،
« یاندیم » دئین طبیعتی دینله دیم ،
بیر مجلیسده عدالتی دینله دیم،
تئللره باخ ، نه حیکمت دی ، نه سیردی ،
یئنه قلبیم گوللرینه اسیردی ،
قیلینج کیمی دوغراییردی ، کسیردی ،
پرده لرده جسارتی دینله دیم ،
بیر مجلیسده عدالتی دینله دیم،
هئچ بیلمدی سویوق نه دی ، ایستی نه ،
باش ائندیردی قارا سازین اوستونه ،
تالان ائتدی ، دوردو جانین قصدینه ،
نئچه – نئچه حیکایتی دینله دیم ،
بیر مجلیسده عدالتی دینله دیم ،
کرم داغ دا له له سینی ایتیردی ،
عابباس کؤچو یورت دان – یوردا اؤتوردو ،
غریب اؤزون شاه صنمه یئتیردی ،
آیریلیق دان شیکایتی دینله دیم ،
بیر مجلیسده عدالتی دینله دیم ،
صؤحبتینی باخیش دئدی ، گؤز دئدی ،
طاهیر یئنه زؤهره سینه دؤز دئدی ،
واقیف جوشدو ، گؤزللره سؤز دئدی ،
دؤنه – دؤنه محببتی دینله دیم ،
بیر مجلیسده عدالتی دینله دیم ،
زیلی ، بمی بیر – بیریندن تزَه – تر ،
سس – سوراغا گلدی وورغون ، علسگر ،
مین نفره لایلا چالدی بیر نفر ،
اؤلمز اولان بیر صنعتی دینله دیم ،
بیر مجلیسده عدالتی دینله دیم ،
گوزلدیر
پاییز کؤورَلدندیر ، باهار جوشدوران ،
منی سرت ائله ین قیش دا گؤزلدیر ،
اورَیین داشدیمی دئمه ، ای اینسان ،
دویماغی باجارسان ، داش دا گؤزلدیر ،
بیر گؤزل چیخاندا جمنه ، دوزه ،
فیکیر وئر یاناغا ، نظر سال اوزه ،
گؤزللیک باخارمی ایرییه ، دوزه ؟
دئمه کی ، ایریدی قاش دا گؤزلدیر ،
« زلیمخان » اولماسین نه آه ، نه آمان ،
آغریدان آغلاماق یاماندیر ، یامان ،
سئوینجین قلبینی دولدوران زامان ،
یاناخدان سوزولن یاشدا گؤزلدیر ،
بیزنییه سئومییک بیر – بیر یمیزی
یئر گؤیو ، داغ داغی ، داش داشی سئودی ،
تانری ناخیش ووردو نقاشی سئودی ،
گؤز گؤزه بویلاندی، قاش قاشی سئودی ،
بیزنییه سئومییک بیر – بیر یمیزی ،
چمنلر تورپاغا خالی چکیرسه ،
خالیدا یاشیلی ، آلی چکیرسه ،
آری چیچکلردن بالی چکیر سه ،
بیزنییه سئومییک بیر – بیر یمیزی ،
اولدوزلار سایریشیب گؤز وورور آیا ،
چئشمه لر چاغلاییب تؤکولور چایا ،
سئونلر گلیرسه هر گون دونیایا ،
بیزنییه سئومییک بیر – بیر یمیزی ،
گول شئهدن گوج آلیر ، مامیر قایادان ،
گؤز اود دان قیزاریر ، چیچک هایادان ،
سوزولوب گلیرسه کؤک دن ، مایادان ،
بیزنییه سئومییک بیر – بیر یمیزی ،
عؤمور گؤز قیرپیمی ، فیرصت آزدیسا ،
کؤنول سون نفس ده سینان سازدیسا ،
اوچوب الیمیزدن گئدن یازدیسا ،
بیزنییه سئومییک بیر – بیر یمیزی ،
عؤمرون هم سئوینجی ، هم آهی وارسا ،
پروانه یانغیسی ، شمع آهی وارسا ،
آدمین جننت ده طاماهی وارسا ،
بیزنییه سئومییک بیر – بیر یمیزی ،
یاغیش گؤزللرین اؤپور اوزونو ،
داملا پیچیلتیلا دئییر سؤزونو ،
شلاله قایادان آتیر اؤزونو ،
طوفان داغی سئویر ، دالغا دنیزی ،
بیزنییه سئومییک بیر – بیر یمیزی ،
قایداق اوول کی خاطیره لره
بو گون دن صاباحا اوزانماسین ال ،
هله صاباحلارا باش وورمایاق گل ،
نئجه یاشامیشیق میلیون ایل اوول ،
گوللر شئهه باتسین ، چیچکلر زره ،
قایداق اوول کی خاطیره لره ،
ایلک سئوگی چیچیی هاردا آچیلیب ،
کیمین چین گؤیریب چمن بیر اینجی ،
سئودا یوللارینا جان آتان گؤزل ،
نه سن بیر اینجی سن ، نه من بیر اینجی ،
آنالار نه قدر اوغوللار دوغوب ،
مجنون لار دوغولوب بلکه مین کره ،
قایداق اوول کی خاطیره لره ،
عشقین سارالمایان چؤهره سی سن اول ،
توخومو من اولوم ، پؤهره سی سن اول ،
آشیق بیر هفته لیک داستان باشلاسا ،
طاهیری من اولوم ، زؤهره سی سن اول ،
شئهلی چمنلردن گول دره – دره ،
قایداق اوول کی خاطیره لره ،
آلدادان ، آلدانان ، ساتدیران ساتان ،
دونیانین ایشلری مزه دی هله ،
اینسانین اینسانا موناسیبتی ،
تیکان دی ، قاندالدی ، نیزه دی هله ،
کؤهنه خاطیره لر دینسین ، دانیشسین ،
تزه خاطیره لر تزه دی هله ،
قایداق اوول کی خاطیره لره ،
بو گون کی سئوگیلر خاطیره لَشمیر ،
بو گون خاطیره یه دؤنمک چتین دی ،
سویوق اورکلرده اؤلور دویغولار ،
ایستی اورکلره ائنمک چتیندی ،
آغریدان ، عذاب دان ، یاس دان ، قایغی دان ،
دانیشماق چتیندی ، دینمک چتیندی ،
اؤز سئوگی پایینی گؤتورسون هره ،
قایداق اوول کی خاطیره لره ،
منیم بو کؤلگه ده بیر خاطیرَم وار
ساخلایا بیلیردیم واختی ، ساعاتی ،
یاشایا بیلیردیم عؤمرو ، حیاتی ،
شیرین بیر اوخشاما ، کؤورَک بایاتی ،
بوتون عؤمروم بویو اونوتمادیغیم ،
واختین اللریمه کئچدیی چم وار ،
منیم بو کؤلگه ده بیر خاطیرَم وار ،
باشیمین اوستونده بارلی بیر بوداق ،
بوداغین آلتیندا اودلو بیر دوداق ،
ایللردی آغلاییر اوردا بیر بولاق ،
یارپاقلار اوستونده هله ده نم وار ،
منیم بو کؤلگه ده بیر خاطیرَم وار ،
اوز کؤزه دؤنموشدو یاناقلار زره ،
آرخادا اوچوروم ، قارشیدا دره ،
هر اینسان عؤمرونون خاطیره لره ،
یئتدیی مقام وار ، چاتدیغی دم وار ،
منیم بو کؤلگه ده بیر خاطیرَم وار ،
بورونوب غرق اولوب یاشیل توللره ،
نغمه تک آخاردی صاف کؤنوللره ،
حئیف تئز قاریشدی سولان گوللره ،
ایندی اوزاقلاردا بیر بختی کم وار ،
منیم بو کؤلگه ده بیر خاطیرَم وار ،
توتور بیلدیینی یارادان خالیق ،
ائله بیل دریادان آیریلیر بالیق ،
یاش کدَر گتیریر ، زامان قوجالیق ،
گؤزومده حسرت وار کؤنلومده نم وار ،
آغاج کؤلگه سینده بیر خاطیرَم وار ،
منیم بو کؤلگه ده بیر خاطیرَم وار ،
قالاردیم
داغلار منه گل – گل دئسه اورَک دن ،
گلیب ائله بو یئرلرده قالاردیم ،
طبیعتله سئوینجیمی ، دردیمی ،
بؤلوب ائله بو یئرلرده قالاردیم ،
نفسیمده یاشاداردیم عطرینی ،
عزیزلردیم چیچکلرین خطرینی ،
عؤمرون – گونون قیمتینی ، قدرینی ،
بیلیب ائله بو یئرلرده قالاردیم ،
نه گؤزل دی بو یئرلرین لالاسی ،
من گئتسم ده کؤنلوم بوردا قالاسی ،
سئوسه منی بیر نامردین بالاسی ،
اؤلوب ائله ائله بو یئرلرده قالاردیم ،
یو سئوینجی آلما منیم الیم دن
دوز آدیملا دوغرو یولو ، گنجلیییم ،
گئری دورما یاغسا دولو گنجلیییم ؛
اوزون یاشا دلی – دولو گنجلیییم ،
دیل نغمه لی ، دوداق سؤزلو ، اورک شن ،
یو سئوینجی آلما منیم الیم دن ،
قارلی ذیروه شؤهرتیم دی ، تاجیم دی ،
داغ قارداشیم ، یاشیل یایلاق باجیم دی ،
کؤنلوم یئنه یوکسکلردن باج اومدو ،
چؤکن دومان ، ائنن بولود ، گلن چن ،
یو سئوینجی آلما منیم الیم دن ،
بو دونیادا صؤحبتیم وار ، دمیم وار ،
بو دریادا عؤمور آدلی گمیم وار ،
بو تورپاقدا بیچیلمَمیش زمیم وار ،
واختسیز اجل ، یئتیشمَمیش هله دن ،
یو سئوینجی آلما منیم الیم دن ،
نغمه قوشوم تاریخینه ، یاشینا ،
هم دم اولوم باهارینا ، قیشینا ،
قوی دولانیم آنا یوردون باشینا ،
سون آیریلیق ، نه سن تلَس نه ده من ،
یو سئوینجی آلما منیم الیم دن ،
ظارافات ائیلمه
ظارافات ائیلمه قوربانین اولوم ،
بو دونیا ظارافات مئیدانی دئییل ،
قاریشقا یئریشی راحات یئریش دی ،
بو مئیدان کؤهلن آت مئیدانی دئییل ،
اوینادیب چوخ شئیی اومار اویناما ،
ائتسه ده روحونو خومار ، اویناما ،
سن بو قومار بازلا قومار اویناما ،
ظارافات گلمَسین سنه بو دونیا ،
چوخ یئرده قبرینی قازان اولاجاق ،
باشین قایناماقدان قازان اولاجاق ،
سانما یاشاماغین آسان اولاجاق ،
ظارافات گلمَسین سنه بو دونیا ،
یوخسوللوق یوخسولون باغرینا اوخدو ،
معده سی توخلارین مزه سی توخدو ،
فیل وار قاریشقاجا حؤرمتی یوخدو ،
ظارافات گلمَسین سنه بو دونیا ،
