az sher

خسرو سرتيبي دن ستارا بير گؤرل شعر

azsher — Wed, 21 Oct 2009 11:37:29 +0000

ناصيرعطاپور آدليم موغام خواننده سي ، سخاوت عزتي ۉ قودرتلي شاعير ۉ ناطيق خسرو سرتيبي

یاشیندا اورَك وار سانكی قاراداغ ،

باشیندا كولَك وار سئحراما كیمی ،

خسرو سرتیبی 63 – 64 اینجی ایللردن بویانا بوتون آذربایجان شعر و ادبیاتینی سئوَن كسلره تانیشدی . اونون گؤزل دانیشیق گوجو ، شعر قدرتی و ادبیاتیمیزا بلد اولماسی اونون میلیونلار اورَكده یئر آلماسینا سسب اولوبدور . سرتیبی بوگون بیر نباتی شوناس كیمی ده تانینیر . اونون بیر چوخ بؤیوك ایشلرین یارانماسیندا دانیلماز خدمتی اولوب او جمله دن چوخلو كنگره لرین یارانماسی اونون چكدیگی امكلرین نتیجه سینده اؤز یئرینی آلمیشدی . سرتیبی همیده قاراداغین بؤیوك شاعیری ستاری سئوَنلردندیر او هر یئرده كی اؤزونه سؤز ماجالی تاپیب ستاردان ، ستار یارادیجیلیغیندان سؤز آچیب دیر . من هر ایكی شاعیریمیزه جان ساغلیغی ، اوغورلو حیات یولو و باشاریلی یارادیجیلیق آرزی ائدیرم . سرتیبی دن ستارا یازیلان بو گؤزل شعرله سیز اوخوجولارادا شن گونلر دیله ییرم

سینه سی درر دن آی دولو شاعیر ،

ایكیمیز بیر شعریك قوشا دفترده ،

سنله منیم طبعیم آی اولو شاعیر ،

ایستیر آراز كیمی ، جوشا دفترده ،

یاشیندا اورَك وار سانكی قاراداغ ،

باشیندا كولَك وار سئحراما كیمی ،

سنه نه اود ووردو ، یازیق قاراباغ ،

قوشمان قان آخیدیر ، اوخشاما كیمی ،

آشیقلار سسینین ، سؤز بَزَییسن ،

باخكی عبدالعلی قاراچی اوخور ،

شاعیرلر جمعینین ، گؤز بَبَییسن ،

سن اوچون هره بیر گرایلی اوخور ،

سن رسسام ناخیشلی ، داغلار شاعیری ،

آرخان شاه اوتوران ، قارشین خان آراز ،

آی چیچك قوخولو ،‌ باغلار شاعیری ،

سن آلله نه یازسان ، یاشاماقدان یاز ،

شعریله سوزولن خیاللارا باخ ،

فیكیرلر اویادیر ، اوركلر آلیر ،

یاشاماق درسیدیر ، كماللارا باخ ،

یئنی گوللر اكیب ، آغاجلار سالیر ،

آی قوپوز ایلهاملی ، اوجالان شاعیر ،

نه قَدَر آراز وار یاشییاجاقسان ،

آی خلق اورَیینده یئر سالان شاعیر ،

نه قَدَر ناماز وار یاشییاجاقسان ،

آراز گول گتیریر هراسدان بری ،

بابام نباتیدان تؤحفه دیر سنه ،

مین خدافرینی ، مین كلئیبری ،

سنه باغیشلاردیم دوشسئیدی منه

حاضيرلايان : سخاوت عزتي – اهرلي عند ليب

ائلخان ممدلي حياتي و شعرلري

azsher — Wed, 21 Oct 2009 11:20:25 +0000

سخاوت عزتي وائلخان ممدلي

ائلخان ممدلی

ائلخان حسین قولو اوغلو ممدلی فولكلورشناس عالیم ، آذربایجان شفاهی خالق ادبیاتینین فعال تدقیقاتچیلاریندان بیری چوخلو سایدا علمی مقاله لرین ، مونوقیرافییالارین یازانی و آذربایجان رادیوسونون « ساری تئل » و « گؤزللمه » وئریلیشلرینین دایمی آپاریجیسیدیر . شعریارادیجلیغیلادا مشغول اولور اونون بو گونلر « بیردنم » آدیلا شعرلر توپلوسو چاپدان چیخیبدیر همان كتابدان بیر نئچه شعر بیرلیكده اوخویاق :

دیوانی :

اولگولو سؤز كؤنول اوخشار ، باجاردیقجا سازدا دئ !

شعر بیر نازلی ملكدی ، هر كلمه نی نازدا دئ !

صادیق دوستان گیلئلنمه ، ائشیدر ، بیلر ، كوسر !

هر كسین اؤز عیبینی ، چالیشگینان اوزده دئ !

بو میللتین عؤمور یولو كرم عؤمروندن كئچیب ،

باشینا نه لر گلیب ، ورَم عؤموروندن كئچیب ،

شربتینی یادا وئریب اؤزو زهریمار ایچیب ،

دانیشماغینان بیتن دئییل ، ایستَییرسن یوزده دئ !

ائلخان ، سن ده گیر مئیدانا ، سازینان اوزبه اوز دایان ،

مجلیسینده صرافلار وار ، سنه باخیر گؤز دایان ،

ایلهامین دوروش گتیرسین ، هله بیر آز دؤز دایان ،

« خان امراه » سازدا دئینی اوغولسانسا سؤزده دئ !

خان امراه ائل آراسیندا قدرتلی آشیق امراه گلممدوفا دئیلر دی قئید ائدك كی امراهین ساز و سؤز ایفاسی اؤز نوبه سینده زلیمخان دیین كیمی بیر گلدی بیر گئتدی

قوشما

آلله

بونئجه سئودادی حاخلادی منی ،

قلم ده عاجیزدی ، یازیم آی آلله

اؤزون گتیرمیسن منی جاهانا،

اؤزونده وئرگینن دوزوم آی آلله ،

تورپاق تورپاق اولار اؤز ثروتیینن ،

ایگید شؤهرت تاپار جسارتیینن ،

دویموشام دونیانین ناز – نعمتینن ،

دویمورگؤزللردن گؤزوم آی آلله ،

یئنه چایلار كیمی چاغلایر ائلخان ،

دردلی سینه سینی داغلایر ائلخان ،

بیر یاندان یاش تؤكور ، آغلایر ائخان ،

بیر یاندان سیزلایر سازیم آی آلله ،

تجنیس :

گؤزلدن گئدر

عاریف مجلیسینده ، صراف یانیندا ،

صؤحبت گول جاماللی گؤزل دن گئدر ،

دویماق اولماز آغ بوخاقدان ، سینه دن ،

گؤزلره باخماقدان گؤز الدن گئدر ،

دردیمی گؤز تؤكوب اویانا دئدیم ،

چكیلسین قارشیمدان او یانا دئدیم ،

یاتمیش یاریم بلكه اویانا دئدیم ،

اویانماز منی ده گؤزل دنگ ائدر ،

دایانمادیم ، چو خدا دئدی او « دایان » ،

اوز چئویردی گئتدی مندن اودا یان ،

ایندی ائخان ، سمندرتك اودا یان ،

گؤزللر سنی ده گؤزل دنگ ائدر ،

گولوم

«قوجا » – دئییب تهنیزلمه گل منی ،

مؤحتشم تونقالام یانیرام گولوم ،

پالید كوسووودور كوسوووم ، اودوم ،

اؤزومو توكنمز سانیرام گولوم ،

بیلیرم جاوانسان نیطقی روانسان،

« سه گاه » دا بورانسان ، آه سان ، آمانسان ،

دردیندن اؤلنی نییه قینارسان ،

چاره مه درمانسان قانیرام گولوم ،

گئجه لی ، گوندوزلو سنینم ، سنین ،

هله اؤلممیشم دیرینم سنین ،

بیر یول دئمیرسن كی ، «گولونم » سنین ،

بونلاری دوشونوب آنیرام گولوم ،

« ائلخانام » جوشقوندور ، عشقیم ، هوسیم ،

سنین خوشبختلییین بسیم دیر ، بسیم ،

نه قدر جانیم وار گلیر نفسیم ،

بو یولدا تك سنی تانیرام گولوم ،

آماندی

فیكیری – ذیكیری مندن اوزاق گزنیم ،

بئله خام خیالا دالما آماندی ،

سنسیز منیم آییم ، گونوم هدردی ،

امیدیمی داشا چالما آماندی ،

سیتمینله یاندیر منی ، یاخ منی ،

شیمشك كیمی قایالارا چاخ منی ،

سورمه اولوم كیپرییینه یاخ منی ،

صاف عشقیمی اله آلما آماندی ،

هجرانینلا « كئف » چكمیشم نه دانیم ،

نه گئجم وار ، نه گوندوزوم ، نه دانیم ،

یاندیریرسان ، « یان » – دئییرسن ، نه یانیم ؟

داها بسدیر ، ظالیم اولما ، آماندی ،

من « ائلخانام » ،‌دونیا گلمز عیینیمه ،

حكك اولوبسان اورییمه ، بئیینیمه ،

طیفیل كیمی گلیم گیریم قوینونا ،

بو فیرصتی مندن آلما آماندی ،

ایسترم

داغلارچون یامانجا داریخمیشام من ،

اوز توتوب قوینونا قالخماق ایسترم ،

راحاتلیق بیلمین قار سئلی كیمی ،

داغلاردان دوزلره آخماق ایسترم ،

آنا طبیعتین قوینوندا گزیب ،

نرگیز – بنؤوشه دن یاخاما دوزوب ،

الیمی بیر آنلیق شهردن اوزوب ،

ساكیتجه دونیایا باخماق ایسترم ،

انگین سمالاردا قارتال تك اوچان ،

ناخیشلی چؤللرده جئیران تك قاچان ،

ایلدیریمه دؤنوب ،‌ شفقلر ساچان ،

قایا چیچیینی قوخماق ایسترم ،

اونوتمام هئچ زامان او منظره نی ،

جئیرانلی دوزلری ، یاشیل چمنی ،

اونوتماز بیلیرم او گؤزل منی ،

من اونون بورجوندان چیخماق ایسترم ،

اؤزومه قاتار

اؤتن گونلریمی قایتار اللهی ،

قایتار ، گنجلییمی اؤزومه قایتار ،

قیشین شاختاسیندا دوندورما منی ،

چیچكلی – چمنلی یازیما قایتار ،

دیشلریمی سؤكدون – دانیشانمادیم ،

ساچلاریمی تؤكدون – دانیشانمادیم ،

شوشه عیینكلره آلیشانمادیم ،

او نورو ، ایشیغی گؤزومه قایتار ،

قایتار اورییمده اولان تپری ،

قایتار دهانیما شهدی – شكری ،

« ائلخانا » اوددورما واختسیز قهری ،

اوولكی گوجومو دیزیمه قایتار ،

حاضيرلايان : سخاوت عزتي – اهرلي عند ليب

ستارين حياتي و اثرلري

azsher — Wed, 21 Oct 2009 09:50:42 +0000

ستار و سخاوت

باخیشلارین ایز سالیب، اوره ییمده باسقی تك

عشقیمین قوجاغیندا خاطیره ن وار بیر اتك

آغزیمدا قوروسادا دیله دیییم سون دیلك

هر ایل باهار گلنده، داغلارا چن دوشنده

سئوه جه یم من سنی سن منی سئومه سنده

((ستّارگول‌محمدی ائل شاعیری))

(سیز ائی موتلو یولچولار آماندیر آیاغینیزی منملیكله یئره باسمایین چئوره‌نیزه یاخشی باخین اولا بیلسین كی، ((جهانی است بنشسته در گوشه‌ای))بوجاقلارا سیغمیش دونیالار وار)) دكتر روشن‌ضمیر(یاد یاران 171)

آذربایجانین گیزلین بوجاقلاریندا دونیالار قده‌ر دونیالار واردیر. دده‌قوربانی،عابباس‌اوفارقانلی،عاشیق واله، مولا جوما، عاشیق العسگر كیمی اولدوزلار بو اونودولموش بوجاقلاردان شعر و ادب ذیروه‌سینده اوجالیب‌لار و قرنیلر یاشایان عنوانی ائلده‌ن آلیبلار. بیر حالداكی زور گوجوایله آد آلانلار زامان اوتدوكجه بوشلوقلارین گوستریبلر اوز چوروك اوزلرین آیدینلادیبلار. بلی ائل ایچینده یاشاییب، سئوینجینه سئوینیب، كدرینه یانماق ائلین خاطیرینده یازیلیب قالاجاقدیر. بو صنعت‌كارلارا ائل اوز آدینی وئریر((ائل شاعیری))((ائل عاشیقی))((ائل ایگیدی))((ائل صنعت كاری)). بونلاردان بیریده آراز قیراغیندا چوخ چتین دورومدا اولان ((شجاعلیلو كندینده یاشایان ستارگول‌محمدی))دیر، ستار‌گول‌محمدی 1320اینجی ایلده آراز قیراغینین»

شوجیلی كندینده آنادان اولوب، ایلك تحصیلاتین آنا یوردوندا و آلتینجی صینیفه‌ده‌ك اهرده بیتیریب. و بو قوجامان قاراداغ شاعیری تورك ادبیاتینین دؤیوش-دیره‌نیش شئعرینده یاشاییر و یاشایاجاق.

ستار بوگون آذربایجانین اونونلا بئله قره‌داغین اوزاق بیر بولگه‌سینده یاشاسادا اونون شعرلری دیلده‌ن- دیله، آغیزدان-آغیزا گزیر، بوگونلر آذری گنجلرینین توی- دویون گونلرینده ستارین شعرلریندن هئچ اولماسا بیر قطعه اوخونور:

دیلین چوخ شیریندی اوره‌گین آجی

اوزونه غم داشی یامانا دونیا

بیر عومور باخمیسان منه قیقاجی

گلمیشم الیندن آمانا دونیا

ستار آذربایجانین گئچمیشین، ایندیسینی، گله‌جه‌گین خاطیرلایاندا اونو تاپدالایانلارا قهرلنیر:

باش ایمریك ظولم اونونده هئچ زامان

آزادلیق، شن حیات، شعاریمیزدیر

یاشاسین آزادلیق یاشاسین اینسان

بو ایلك آرزوموزدور قراریمیزدیر

ــــــــــــــــــــ

هر زامان ظولمت‌له پنجه‌له‌شه‌ره‌ك

عصیان یاراتمیشیق چوخ عصیرلرده

كؤكونو لاخلادیب تیتره‌دره‌ك

ظولمكار شاهلاری نور قصیرلرده

ــــــــــــــــــــ

منیم اولوسوما، منیم ائلیمه

سن ای حقارتله یان باخان آلچاق

درین فلسفه‌لی اولو دیلیمه

مین بؤهتان سویله‌ییب شر یاخان آلچاق

ــــــــــــــــــــ

اوخو داستانینی دده‌م قورقودون

گور نه‌لر یازیلیب عظمتینه

ایندیده اویانار اوجاغین، اودون

قیزینیر نسلیمیز حرارتینه

ــــــــــــــــــــ

ستار خوجالی، فضولی، جبرائیل، زنگیلان قیرغینلارین، قاچقنلارین یاخیندان گؤرن و اونلارین دردلرین اؤز كسكین قلمیله، شعریله دونیانین سوسقون ویجدانلارینا نفرتله چیغیران شاعیردیر:

آستا دانیش عاشیق سیرری بیلن وار

خوجالیدان، جبرائیلدان گلن وار

بوردا اوغلو، بوردا قیزی اولن وار

غم پرده‌سین غم اوستونه سال عاشیق

بوگون منه بیر كرمی چال عاشیق

ــــــــــــــــــــ

گؤزوم باخا- باخا قلبیم اولدو قان

اسیر اولدو ائرمنی‌یه مسلمان

داغیلدی خوجالی، یاندی زنگیلان

دونیانین آغزیندا سوسدو دیل عاشیق

بوگون منه بیر كرمی چال عاشیق

ــــــــــــــــــــ

ستار ائلیمیزین، یوردوموزون اصیل ((ائل شاعیر))لریندن بیری دیر. واقیف‌لرین، قوربانی‌لرین آدلارینی یاشادان خالق ستاریندا آدینی یاشاداجاق و اونا اولوس اؤدولو(میللت میدالی) وئره‌جك:

من اودلار یوردویام، حئكمت دونیاسی

آغزیمین سوزونو قاپانا مینت

آخیر اوره‌گیمده‌ن حیات چئشمه‌سی

منده شیرین حیات یاپانا مینت

ــــــــــــــــــــ

عصیرلر كئچدیكجه من آل‌لاشیرام

هیجرانلار قوینوندا ویصال‌لاشیرام

سینه‌م سوكولدوكجه كمال‌لاشیرام

آی هارای! سینه‌می سوكه‌نه مینت

ــــــــــــــــــــ

قوی هارای قوپارسین الیمده‌كی تار

نغمه‌م ایلریریم تك گویلری یارار

آددیما بیر اولو صنعتكاریم وار

آراییب آختاریب تاپانا مینت

ــــــــــــــــــــ

منی مرد اوغوبدور دوغاندا آنام

زورلویا زولویام، جانسیزا جانام

من آذربایجانام، آذربایجانام

((ستار)) تك قلبیمه هوپانا مینت

“بو گون منه بیر كرمی چال آشیق”

مین بیر دردیم هاوالانیب سینمده

بوگون منه بیر كرمی چال آشیق

قان غلاسین اورگیمنن دیده مده

سنده باخیب هر دردیمی بیل آشیق

بوگون منه بیر كرمی چال آشیق

چال یاییلسین بو غم، غصه هر دیله

تك بیر اورك دوزمز بئله نیسگیله

درد بؤیوك دور بم چیخارتماز، چك زیله

قیریلماسین سازینداكی تئل آشیق

بوگون منه بیر كرمی چال آشیق

من كی سنده آرامیرام یاراشیق

بیلدییینی اسیرگمه چال آشیق

كؤنلوم كیمی دونیام گلیب قاریشیق

وارلیغیما اسیر یامان یئل آشیق

بوگون منه بیر كرمی چال آشیق

بو گون یامان ایتیرمیشم اؤزومو

تاپانمیرام آغزیمداكی سؤزومو

اللریمده گیزلتمیشم اوزومو

سان كی باتیر گؤزلریمه میل آشیق

بوگون منه بیر كرمی چال آشیق

گؤزوم باخا باخا قلبیم اولدو قان

اسیر اولدو ائرمنییه موسلمان

تالاندی جبراییل، یاندی زنگیلان

دونیانین آغزیندا سوسدو دیل آشیق

بوگون منه بیر كرمی چال آشیق

توپ،‌تانگیلا هر طرفی اویدولار

ائل اوبانی یامان گونه قویدولار

وارین یوخون الدن اله سویدولار

كیمسه ده قالمادی دؤولت مال آشیق

بوگون منه بیر كرمی چال آشیق

اورییمی یامان آلیب سكسكه

وارلیغیما گؤلگه سالیب تهله كه

خبر گؤندر كوراوغلویا،‌بابكه

یامان یئرده تورا دوشوب ائل آشیق

بوگون منه بیر كرمی چال آشیق

بیرده بو دهشتی گؤرمه سین گؤرن

كؤنلومه غم چؤكدو، گؤزلریمه چن

اؤنو آراز كسدی،‌آرخانی دوشمن

نلر اولدو دیلیم اولسون لال آشیق

بوگون منه بیر كرمی چال آشیق

سؤیله خان چوپانا ساخلا ال بیر آز

داها بوندان سونرا آز سارادان یاز

مینلرله سارامی آپاردی آراز

هاممیسی گول یاناق اینجه بئل آشیق

بوگون منه بیر كرمی چال آشیق

آمان آشیق آستا دانیش بیلن وار

جبراییلدان،‌زنگیلاندان گلن وار

بوردا اوغلو، بوردا قیزی اؤلن وار

غم پرده سین، غم اوستونه سال آشیق

بوگون منه بیر كرمی چال آشیق

یانان كؤرپه لرین آهی، ناله سی

قاچان آنالارین بالا وای سسی

موردار دیغالارین اودلو گوللـله سی

صحنه یه وئرمیشدی باشقا حال آشیق

بوگون منه بیر كرمی چال آشیق

سؤیله شمشیر اویان اولدو گؤر نلر

گؤر نه گونه قالدی یوردون كلبجر

روحون مندن اینجیمه سین علسگر

گلنمه دیم اوزاق دوشدو یول آشیق

بوگون منه بیر كرمی چال آشیق

اینانمیرام ساغلیغیما چارام وار

شوشام كیمی داغیلمامیش هارام وار

گؤیجه آدلی بیر ساغالماز یارام وار

تزه لنیر دولاندیقجا ایل آشیق

بوگون منه بیر كرمی چال آشیق

ندیر شعر

گؤسترمز اوزون هر یئته نه دؤولت دیدار

باغ ایچره گولون عطرین هاردان دوشونر خار

جاهیل نه بیلر عالم معناده نلر وار

دیل قانیدی، گؤز نورودو، جان قیمتی دیر شعر

عارفلر ایچون معنوی ائل ثروتی دیر شعر

حیكمت كیمی داییم آچیلار سؤز دیلگیندن

هر قلبه آچار بیر یئنی یول اینجه لیگیندن

داهیلره مین فئیض وئرر اؤز بیلیگیندن

هر عصریلرین یادداشی زنگین سسی دیر شعر

اؤلمز حیاتین دیلده گزن نغمه سی دیر شعر

بعضن اوجالار ائلده نیظامی شكیلینده

ظولمتلره میدان اوخویار مشعل الینده

بعضن دیل آچار دونیادا خاقانی دیلینده

حقسیزلیك اولان اؤلكه ده یاس دیر، آغی دیر شعر

ظولمون قاباقیندا دایانان قاف داغی دیر شعر

بعضن اؤیونر صاف سولارین زمزمه سینده

بعضن دویولار داهی فیضولی نفسینده

بعضن بوغولار عصرلرین دار قفسینده

حاققی سئون اینسانلارین اؤتگون دیلی دیر شعر

حسرتده یانان سئوگی لرین نیسگیلی دیر شعر

شیمشك كیمی حیددتلی دیر، كسگین دی قیلیشدان

مئیداندا كئچر الده غضب سونگوسو داشدان

غفلتده یاتان میللتی جارلار هر اوباشدان

كئچمیشلرین اوسطوره سی، هئیكلی دیر شعر

هر عصریده حاققین اوزانان مرد الی دیر شعر

سئوه جه یم من سنی

منی سئومه سنده

باخیشلارین ایز سالیب، اوره ییمده باسقی تك

عشقیمین قوجاغیندا خاطیره ن وار بیر اتك

آغزیمدا قوروسادا دیله دیییم سون دیلك

هر ایل باهار گلنده، داغلارا چن دوشنده

سئوه جه یم من سنی سن منی سئومه سنده

شفقلردن آل گونش، پنجره سین آچاندا

داغلار قیزیل لاله دن، گول دؤشونه ساچاندا

زمیلرده سونبوللر، یئلكن كیمین اوچاندا

سرین یئللر اؤپنده، گول یاناغین چمنده

سئوه جه یم من سنی سن منی سئومه سنده

بوز بولاقلار چیچكدن، بویون باغی دوزنده

زمرود دونلو سؤیودلر، گؤی سولاردا اوزنده

یاماجلاردا بنؤوشه، دوداقلارین بوزنده

سئوه جه یم من سنی سن منی سئومه سنده

حاضيرلايان : سخاوت عزتي

زليمخان نين شعلري وحياتي

azsher — Wed, 21 Oct 2009 08:26:29 +0000

زليمخان يعقوب

زليمخان و سخاوت عزتي

زلیمخان یعقوب

زلیمخان یعقوب2/1/1950اینجی ایلده گورجستان جمهورییتینین بولنیسی ائلینین« كپنكچی» كندینده آیدین بیر عایله ده دونیایا گلدی . آتاسی فن معلیمی اولسادا ادبیاتا اوستونلوك وئریردی .آناسی گوللو خانیم تورك فولكولورونون یاخشی بیله نی ایدی .اؤزللیكله بایاتیلار ، ناغیللار،داستانلار ساحه سینده تانینمیش بیلنلردنیدی .آیریجا آناطرفینده ده یرلی شاعیرلر واریدی . بویوك دده سی« آلخاص آغا حاج عالی اوغلو(1)» نو تانیمایان یوخیدی .1967 اینجی ایلده دوغما كندینده اورتا مكتبی قورتایب آذربایجان دؤولت بیلی یوردونون كیتابخانه چیلیك فاكولته سینی بیتیردی . ادبی یارادیجیلیغا 15 یاشینداایكن « مئشه بی » آدلی لیریك شعرله باشلادی . ایلك شعری بولنیسی نین « غلبه بایراغی » غزئته سینده یاینلاندی . 1968 ایجی ایلینده باكی یا یئرلشدی ادبی ، اجتماعی فعالییتینی باكی نین ایستی قوجاغیندا آذر كیتاب تشكیلاتیندا ساتیجی ، باش ساتیجی ، شعبه مودورو ، كؤنوللو كیتاب سئورلر جمیعتینده مركزی یایین مودورو یازیچی نشرییاتیندا ادبی شعبه مودورو كیمی وظیفه لرینده باشلادی 1995و2000 ایجی ایللر ایكی كره اولاراق آذربایجان میللی مجلیسینه باكی دان میللت وكیلی سئچیلدی

(1)شاعیرین شعرلریندن « عاشیقلاردان ایشقلار » توپلوسوندا وئرمیشیك سخاوت عزتی.

شاعیرین چاپ اولموش اثرلری :

1ــ كؤنلومون سسی گنجیلیك 1980 باكی

2ــ یولوم ائلدن باشلانیب یازیچی 1981 باكی

3ــ اود آلدیغیم اوجاغلار یازیچی 1989 باكی

4 ــ بیز بیر عشقین بوتاسییق یازیچی 1989 باكی

6 ــ زیارتین قبول اولسون گنجلیك 1991 باكی

7 ــ شاعیر طالعی (فرانسیزجا ) گنجیلیك 1991 باكی

7 ــ شاعیر هارایی گنجیلیك 1995 باكی

9 ــ بیر الی تورپاقدا بیر الی حاقدا آذربایجان 1997 باكی

9 ــ بویاشیل آغاجین آلتی بیزیمدی آذربایجان2000 باكی

10 ــ سؤز جامی ( گورجو دیلینده ) آذربایجان2000 باكی

10 ــ زلیمخان یعقوب ( فوتو آلبومو ) آذربایجان2001باكی

12ــ سنی سئومك اوچون گلدیم دونیایا اوجاق 2003 استانبول

13 ــ زلیمخان یعقوب یاشایشی و بیرنئچه شعرلری بیلفئلد آلمان

14 ــ زلیمخان یعقوب . نیظام الدین اونك آنكارا 2003

15 ــ من سنین قلبینه نئجه یول تاپیم آذربایجان 2004 باكی

16 ¬¬– قایداق اوول کی خاطیره لره گنجلیک 2005 باکی

17 – گؤزلریمین نورو دوغولدوغوم بوتورپاق پئداگوژییا 2005 باکی

18 – من بیر داغ چاییام پئداگوژییا 2006 باکی

عدالتی دینله دیم

کیم کئچردی او کئچدییی یوللاری ،

کیم آشاردی او آشدیغی یاللاری ،

کیم ووراردی او ووردوغو خللاری ،

افسانه نی ، حقیقتی دینله دیم ،

بیر مجلیسده عدالتی دینله دیم ،

بارماغیندا اود اولموشدو تزَنه ،

بیز یانیریق اوجاغا نه ، کؤزه نه ،

داش دئیردیم آلیشماییب دؤزنه ،

« یاندیم » دئین طبیعتی دینله دیم ،

بیر مجلیسده عدالتی دینله دیم،

تئللره باخ ، نه حیکمت دی ، نه سیردی ،

یئنه قلبیم گوللرینه اسیردی ،

قیلینج کیمی دوغراییردی ، کسیردی ،

پرده لرده جسارتی دینله دیم ،

بیر مجلیسده عدالتی دینله دیم،

هئچ بیلمدی سویوق نه دی ، ایستی نه ،

باش ائندیردی قارا سازین اوستونه ،

تالان ائتدی ، دوردو جانین قصدینه ،

نئچه – نئچه حیکایتی دینله دیم ،

بیر مجلیسده عدالتی دینله دیم ،

کرم داغ دا له له سینی ایتیردی ،

عابباس کؤچو یورت دان – یوردا اؤتوردو ،

غریب اؤزون شاه صنمه یئتیردی ،

آیریلیق دان شیکایتی دینله دیم ،

بیر مجلیسده عدالتی دینله دیم ،

صؤحبتینی باخیش دئدی ، گؤز دئدی ،

طاهیر یئنه زؤهره سینه دؤز دئدی ،

واقیف جوشدو ، گؤزللره سؤز دئدی ،

دؤنه – دؤنه محببتی دینله دیم ،

بیر مجلیسده عدالتی دینله دیم ،

زیلی ، بمی بیر – بیریندن تزَه – تر ،

سس – سوراغا گلدی وورغون ، علسگر ،

مین نفره لایلا چالدی بیر نفر ،

اؤلمز اولان بیر صنعتی دینله دیم ،

بیر مجلیسده عدالتی دینله دیم ،

گوزلدیر

پاییز کؤورَلدندیر ، باهار جوشدوران ،

منی سرت ائله ین قیش دا گؤزلدیر ،

اورَیین داشدیمی دئمه ، ای اینسان ،

دویماغی باجارسان ، داش دا گؤزلدیر ،

بیر گؤزل چیخاندا جمنه ، دوزه ،

فیکیر وئر یاناغا ، نظر سال اوزه ،

گؤزللیک باخارمی ایرییه ، دوزه ؟

دئمه کی ، ایریدی قاش دا گؤزلدیر ،

« زلیمخان » اولماسین نه آه ، نه آمان ،

آغریدان آغلاماق یاماندیر ، یامان ،

سئوینجین قلبینی دولدوران زامان ،

یاناخدان سوزولن یاشدا گؤزلدیر ،

بیزنییه سئومییک بیر – بیر یمیزی

یئر گؤیو ، داغ داغی ، داش داشی سئودی ،

تانری ناخیش ووردو نقاشی سئودی ،

گؤز گؤزه بویلاندی، قاش قاشی سئودی ،